ಕಾಳುಮೆಣಸು ಆಮದು:ಒಂದೇ ತಿಂಗಳಲ್ಲಿ ಪ್ರತಿ ಕೆಜಿ ಬೆಲೆ ₹55 ಕುಸಿತ

ಶ್ರೀಲಂಕಾ, ವಿಯೆಟ್ನಾಂ, ಬ್ರೆಜಿಲ್ ಮೊದಲಾದ ದೇಶಗಳಿಂದ ಭಾರತಕ್ಕೆ ಭಾರಿ ಪ್ರಮಾಣದಲ್ಲಿ ಕಾಳುಮೆಣಸು ಆಮದಾಗಿದ್ದರಿಂದ ದೇಶೀಯ ಮಾರುಕಟ್ಟೆಯಲ್ಲಿ ಕರಿಮೆಣಸು ದರ ಕುಸಿದಿದೆ.

ಜುಲೈ ತಿಂಗಳಲ್ಲಿ ಶ್ರೀಲಂಕಾದಿಂದ 4,350 ಟನ್ ಹಾಗೂ ವಿಯೆಟ್ನಾಂ ಮತ್ತು ಬ್ರೆಜಿಲ್‌ನಿಂದ ಸುಮಾರು 600 ಟನ್ ಕಾಳುಮೆಣಸನ್ನು ದೇಶಕ್ಕೆ ಆಮದು ಮಾಡಿಕೊಳ್ಳಲಾಗಿದೆ. ದೇಶದಲ್ಲಿ ಬೆಲೆ ಹೆಚ್ಚಿದ ಹಿನ್ನೆಲೆಯಲ್ಲಿ ಆಮದು ಆದೇಶ ಮಾಡಲಾಗಿದ್ದು, ಒಂದು ತಿಂಗಳಲ್ಲೇ ಬೆಲೆ ಕುಸಿದಿದೆ.

ಕಾಸರಗೋಡಿನಲ್ಲಿ ಒಂದೇ ತಿಂಗಳಲ್ಲಿ ಪ್ರತಿ ಕೆಜಿ ಕಾಳುಮೆಣಸು ಬೆಲೆ 55 ರೂ. ಕುಸಿದಿದೆ. ತಿಂಗಳ ಹಿಂದೆ 670 ರೂ.ಗೆ ಖರೀದಿಸಲಾಗಿದ್ದು, ಶುಕ್ರವಾರ 615 ರೂ.ಗೆ ಕುಸಿದಿದೆ. ಗುರುವಾರ ಇದೇ ಕಾಳುಮೆಣಸಿಗೆ ಕೆಜಿಗೆ 620 ರೂ. ಇತ್ತು. ಹೀಗೆ ಒಂದೇ ದಿನದಲ್ಲಿ 5 ರೂ. ಕುಸಿದಿದೆ.

ಕ್ಯಾಂಪ್ಕೋ ಸಂಸ್ಥೆ ಮಾತ್ರ ಸಾಂದ್ರತೆ, ಗುಣಮಟ್ಟ ನೋಡಿಕೊಂಡು 10 ರೂ. ಹೆಚ್ಚುವರಿ ನೀಡುತ್ತಿದೆ. ಮುಂದಿನ ದಿನಗಳಲ್ಲಿ ಕಾಳುಮೆಣಸು ದರ 500 ರೂ.ಗೆ ಕುಸಿಯಬಹುದು ಎಂಬ ಆತಂಕ ರೈತರನ್ನು ಕಾಡುತ್ತಿದೆ. ಕೊಚ್ಚಿಯಲ್ಲಿ ಪ್ರತಿ ಕೆಜಿ ಗಾರ್ಬಲ್ಸ್ ಕಾಳುಮೆಣಸಿಗೆ 640 ರೂ. ಹಾಗೂ ಇಡುಕ್ಕಿಯಲ್ಲಿ ಕೆಜಿಗೆ 635 ರೂ.ಗೆ ಖರೀದಿಸಲಾಗಿದೆ.

ಬೆಲೆ ಮತ್ತಷ್ಟು ಕುಸಿಯುವ ಸಾಧ್ಯತೆ

ಶ್ರೀಲಂಕಾದೊಂದಿಗಿನ ಮುಕ್ತ ವ್ಯಾಪಾರ ಒಪ್ಪಂದದ ಪ್ರಕಾರ ಭಾರತಕ್ಕೆ ಈ ವರ್ಷ 2,000 ಟನ್ ಕಾಳು ಮೆಣಸನ್ನು ಸುಂಕ ರಹಿತ ಆಮದು ಮಾಡಿಕೊಳ್ಳಲು ಅವಕಾಶವಿದೆ. ಆಮದು ಮಾಡಿಕೊಳ್ಳಲಾದ ಕಾಳುಮೆಣಸನ್ನು ಮಾರುಕಟ್ಟೆಯಲ್ಲಿ ತ್ವರಿತವಾಗಿ ಮಾರಾಟ ಮಾಡಲು ಕ್ರಮ ಕೈಗೊಳ್ಳಲಾಗುತ್ತಿದೆ.