CoffeeFeatured News

ಕಾಫಿ ರಫ್ತು ಹೆಚ್ಚಳ – ಕಾಫಿ ಬೆಳೆಗಾರರಿಗೆ ಸಂತಸದ ಸುದ್ದಿ

ಕೋವಿಡ್‌-19 ಹೊಡೆತಕ್ಕೆ ತತ್ತರಿಸಿದ್ದ ಭಾರತದ ರಫ್ತು ವಲಯ ಕಳೆದ ಏಳೆಂಟು ತಿಂಗಳಿನಿಂದ ಸತತವಾಗಿ ಚೇತರಿಸುತ್ತಿದೆ. ಕಾಫಿ, ಗೋಧಿ, ಜವಳಿ, ಆಟೋಮೊಬೈಲ್‌, ಎಂಜಿನಿಯರಿಂಗ್‌ ರಫ್ತು ಸುಧಾರಿಸಿದೆ ಎಂದು ಅಂಕಿ -ಅಂಶಗಳು ತಿಳಿಸಿವೆ. ಕಾಫಿ ರಫ್ತು ಹೆಚ್ಚಿರುವುದು ಹಲವು ವರ್ಷಗಳಿಂದ ಬೆಲೆ ಇಲ್ಲದೆ ಕಂಗೆಟ್ಟಿದ್ದ ಕಾಫಿ ಬೆಳೆಗಾರರ ಪಾಲಿಗೆ ಶುಭ ಸುದ್ದಿಯಾಗಿದೆ.

ಕಳೆದ ಜನವರಿ-ಆಗಸ್ಟ್‌ ಅವಧಿಯಲ್ಲಿ ಭಾರತದ ಕಾಫಿ ರಫ್ತಿನಲ್ಲಿ ಶೇ. 14ರಷ್ಟು ಹೆಚ್ಚಳ ದಾಖಲಾಗಿದೆ. ಭಾರತದ ಇನ್‌ಸ್ಟಂಟ್‌ ಕಾಫಿ, ಅರೆಬಿಕಾ ಮತ್ತು ಕಾಫಿಗೆ ಬೇಡಿಕೆ ಸೃಷ್ಟಿಯಾಗಿದೆ. ಜನವರಿ 1 ರಿಂದ ಆಗಸ್ಟ್‌ 31ರ ತನಕ 2.56 ಲಕ್ಷ ಟನ್‌ ಕಾಫಿ ರಫ್ತಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 2.25 ಲಕ್ಷ ಟನ್‌ ರಫ್ತಾಗಿತ್ತು. ಕಳೆದ ವರ್ಷ ಕಾಫಿ ದರ ಕಡಿಮೆಯಾಗಿ ಬೆಳೆಗಾರರು ಸಂಕಷ್ಟಕ್ಕೀಡಾಗಿದ್ದರು. ಆದರೆ ಈ ಬಾರಿ ರಫ್ತು ಹೆಚ್ಚಾಗಿರುವುದರಿಂದ ಕಳೆದ ಕೆಲವು ತಿಂಗಳಿನಿಂದ ಕಾಫಿ ಬೆಲೆ ಏರುಮುಖವಾಗಿದೆ. ಆದರೆ ಕಾಫಿ ಸಂಗ್ರಹವಿಲ್ಲದೆ, ಬೆಳೆಗಾರರಿಗೆ ಮಾತ್ರ ಇದರ ಲಾಭ ಸಿಗುತ್ತಿಲ್ಲ.

”ಕಳೆದ ವರ್ಷ ಬೆಳೆ ಕುಸಿತದ ಪರಿಣಾಮ, ಈ ವರ್ಷ ನಿರೀಕ್ಷಿತ ಮಟ್ಟದಲ್ಲಿ ರಫ್ತಾಗದಿದ್ದರೂ, ಆರೋಗ್ಯಕರ ಚೇತರಿಕೆ ಆಗಿರುವುದು ತ್ರಪ್ತಿದಾಯಕವಾಗಿದೆ” ಎಂದು ಕಾಫಿ ರಫ್ತುದಾರರ ಅಸೋಸಿಯೇಶನ್‌ ಅಧ್ಯಕ್ಷ ರಮೇಶ್‌ ರಾಜ ಹೇಳಿದ್ದಾರೆ. ಮುಖ್ಯವಾಗಿ ಯುರೋಪ್‌ನಲ್ಲಿ ಭಾರತದ ಕಾಪಿಗೆ ಭಾರಿ ಬೇಡಿಕೆ ಸೃಷ್ಟಿಯಾಗಿದೆ.

Also read  International Yoga Day:From Dehradun to Dublin, there's only Yoga